Assalamualaikum....
Den memang perokok tegar sojak di universiti lagi. Kawan-kawan den golarkan den dongan panggilan nago sobab memang tegar betul den ni. Ponah den hisap 50 batang rokok sehari sobab nak menyiapkan tugasan den. (Bolajar Engineering tension kan).
Tapi rahmat Allah sapo nak menyangkal. Setolah 11 tahun jadi nago, Allah menunjukkan kasih sayangnyo pado den dongan mengirimkan hambanyo yang bernamo GERD pado den. Sapo GERD tu?
GERD ni sejonis ponyakit dalam porut yang poritnyo lagi dahsyat dari gastrik. ( Nak detail google jolah). Maso ado ponyakit ni, den raso sosak nafas, badan lomah, muntah-muntah dan raso berdobar-dobar. Maso kono ni den rasa dah tibo kot time nak mati. Den google punco penyakit den dan antaro sobab utamonyo adalah merokok.
Tibo-tibo den teringek, banyak kali den berjanji dongan isteri nak beronti merokok tapi susah betul nak buat. Sekarang dongan kasih sayang Allah, Allah kirimkan GERD dokek den untuk den beronti. Den sodar banyak khilaf den. Pado Isteri den, den minta ampun yo sobab lambek sangat tunaikan janji. Allah hantar si GERD ni nak luruhkan doso-doso kito, sobab kitokan ado berhajat nak jadi tetamu Allah nanti, jadi sebolum jadi tetamunNyo, konolah bersih dan suci dulu......
Akhir kalam.... Berontilah merokok tu kengkawan Nago den
No comments:
Post a Comment